Asanblada sortu da!

Hiru asanblada egin ditugu oraindik. Asanbladak nola egin ere asmatzen gabiltza, haurren parte hartzea oraindik helburua da eta ez errealitatea, baina bidea hasi dugu eta ez da gutxi!

Hiru asanblada hauetan 6-8 familia elkartu gara, hitz egin dugu gai ezberdinen inguruan eta haurrentzako eta haurrekin ekintzak egin ditugu. Kartzela zaharreko patioa kolorez bete ditugu! ipuinak , jolasak eta margoak izan dira protagonista asanblada guztiak eta gero!

Blog honetan asanbladen kronikak ikusteko aukera izango dituzu, egiten ditugun ekintzen argazki batzuk…eta poliki-poliki atal ezberdinak sortzen eta elikatzen ere joango gara.

Gurasotasunaren ingurukoak, interesgarriak iruditzen zaizkigunak, bideoak, gomendioak, asanbladako familia eta parte hartzaileok idatzitakoak.

Asanblada berezi honek bideari ekin dio, blog hau bidelagun izango du, ea zer irteten den!

KHGA

Anuncios

hau guraso asanbladako lehen posta da

GARTZELA ZAHARREKO HAUR ETA GURASOEN ASANBLADA

ASANBLADA DEIALDIA: MARTXOAK 9

ARRATSALDEKO 18:00AK GARTZELA ZAHARREAN

 

Zertarako guraso asanblada bat?

Asanbladan erabakiko dugu zertarako elkartu; Aisialdi ekintzak antolatzeko, gurasotasunean sortzen zaizkigun kezka eta zalantzak argitzeko bidea sortzeko, hezkuntza eredu ezberdinak aztertzeko, herrian gure semealaben eskubideak defendatzeko, haurren parte hartzea sustatzeko, beste herrietako dinamikak ezagutzeko…

Asanblada erabilgarri izan beharko da, gustora parte hartzen dugun momentua eta ez marroi bat, bakoitzak bere parte hartzeko modu eta denbora erabakiko du.

Kezka, nahi, zalantza, proiektu antzekoak ditugun gurasook eskolaz gaindiko elkargune bat izateko.

Gure seme alabei gizartearen aurrean jarrera posible ezberdinak aurkezteko; Ez dago eginda jasotzera itxaron beharrik: elkartu, antolatu eta gauzatu dezakegu.

Zertarako haurren asanblada bat?

Haurren parte hartze aktiboa sustatzeko, erabakiak hartzen, eztabaidatzen , parte hartzen… ikasteko. Beraien hitza kontutan hartzeko.

Zein oinarri izango ditu asanbladak?

Irekia: Asanblada irekia izango da. Erabakitzen dugun oinarriekin bat egingo duen edonork parte hartzea proposatzen da.

Eskolaz gaindikoa: Eskola ezberdinetan badaude guraso elkarte, eskolak… Asanbladak ez die lekua kendu nahi, beste hutsune bati erantzun nahi dio. Eskolaz gaindiko proiektu herritarra izatea bilatuko da.

Euskalduna: Euskara izango da oinarri

Hezitzailea: Antolatzen ditugun ekimenetan adostutako balore hezitzaileak bultzatuko dira.

Parte hartzaileen beharrei egokitua :Asanbladako kideen beharrei egokituko zaio dinamika. Guk erabakiko dugu zer motako ekintzak antolatu. Gure zalantzak argitzeko, aisialdirako, haurren hezkuntzarako…

kartzela zaharreko haur eta gurasoen asanblada